5. desember var det skitur i tåke og sol på Valdresflye

Sol og glitrande kornsnø, kan det bli betre?
Sol og glitrande kornsnø, kan det bli betre? Foto: Tor Harald Skogheim

Det er ikkje alltid vêret stemmer med vêrmeldinga, og det kan slå begge vegar. Vi var åtte som møttest på toppen av Flye klokka 10 på laurdagen, i tjukk tåke, sjølv om yr hadde varsla sol og blå himmel. Etter ei kort påminning om smittevernreglar samt litt praktiske opplysningar elles, var det berre å finne fram kart og kompass.

DNT-turen skulle gå sørvestover på Flye, i same retning som sommarruta mot Torfinnsbu. Her har vi tidlegare hatt flotte turar, både i november/desember og på vårparten. Og nesten ingen andre går her, i motsetnad til folkevandringane mot Rasletinden og Kalvehøgdene.

Første timen av fellesturen på Valdresflye gjekk i tett tåke
Første timen av fellesturen på Valdresflye gjekk i tett tåke Foto: Tor Harald Skogheim

Skikkeleg kompassmarsj var ikkje nødvendig, berre omtrentleg retning på kompasset. Det var heilt stille, men sikt nær null, og nesten ingen steinar å sikte mot, så det kjendest litt på lykke og fromme. Etter ei stund traff vi rett på tre vardar langs sommarruta, vi var altså førebels på bra kurs.

Alle i fylgjet fekk prøve å gå fyrst i tåka, og det var dessutan noko brøyting i 10 - 20 cm kornsnø. Begge deler var ganske slitsamt, men tydelegvis ei nyttig erfaring.

Endeleg tek det til å lysne
Endeleg tek det til å lysne Foto: Tor Harald Skogheim

Etter ein time sprakk skydekket opp, og vi fekk tre timar med glitrande sol, blå himmel og utsyn mot fjella i sør og aust. Matpausen var i sol, og vi fortsette i godt over ein time til før vi snudde. Eit stykke på tilbaketuren skya det snøgt til att, slik at siste timen var i skikkeleg gråvêr. Men ikkje på langt nær så ille som i starten, og no hadde vi jo sporet å gå i!

Ein veldig triveleg tur, der vi alle fekk oppleve kor skiftande fjellet kan vere - og kor flott og godt det er å vere ute og bruke kroppen!

Referent og turleiar: Tor Harald Skogheim

Triveleg matpause nær Breilaupa, med utsyn mot Gluptindane
Triveleg matpause nær Breilaupa, med utsyn mot Gluptindane Foto: Tor Harald Skogheim

Skrevet av Jørgen Wangensteen 6. desember 2020